«Без татарлар — дәүләтле халык варислары» дип аталган әлеге бәйрәм Халыклар дуслыгы йортында узды. Ул Татарстандагы Милли мәдәниятләр һәм гореф-гадәтләр елына багышланган иде. (ФОТО)
Фойеда Кол Гали ис. милли китапханә хезмәткәрләре татар халкы тормышын чагылдырган чигүле тастымалар, кул яулыклары, милли киемнәр үрнәкләрен тәкъдим иттеләр, ә Ташлык авылыннан килгән Хамзиннар гаиләсе татар халкының инде онытылып баручы, баллы, татлы, яңарак төр орлыклы чәк-чәкне әзерләп алып килгән иде. Хуҗабикә аны ничек пешергәнен дә сөйләп аңлатты. Матур итеп бизәлгән өстәлдә татар халкының милли ашлары: бәлеш, бавырсак, төш, өчпочмак, вак гөбәдия һәм башка тәм-томнар барлык кунакларның авызыннан суларын агызырдай булып торгандыр дип уйлыйбыз.
«Талир тәңкә» фольклор ансамбле, 49 нчы балалар бакчасы төркеме милли киемнәрне күрсәттеләр, шигырьләр сөйләделәр, биеделәр. Соңыннан барлык кунакларны, катнашучыларны тәм-том белән сыйладылар.
Чара алга таба концерт залына дәвам итте. Программада «Талир тәңкә», «Илхам» ансамбле, «Нардуган» җыр-бию ансамбле, аерым башкаручылар үзләренең талантларын күрсәттеләр. Шәңгәлче авылы клубы хезмәткәрләре оештырган фольклор театры татар халкының «Өй юу» күренешен сәхнәләштерде.