(25 апрель 2019) Түбән Каманың Халыклар дуслыгы йортында балалар өчен Театр елына багышланган мавыктыргыч чара узды. Шулай ук алар Казан шәһәренең җиде театрына виртуаль сәяхәт кылды.
Балалар татар театры тарихы белән таныштылар, артист һөнәре, театр профессияләре, театрда үзеңне ничек тотарга кирәклеге, танылган артистлар турында мәгълүмат алдылар.
“Әкият” татар дәүләт курчак театры турындагы презентация балалар күңеленә бигрәк тә хуш килде. Алар Г.Тукайның “Су анасы”, С.Аксаковның “Аленький цветочек” исемле курчак театры спектакльләреннән өзекләр карап хозурландылар.
Эчкерсез, ихлас балалар вакытны күңелле үткәрделәр, уен формасында барган әлеге дәрестә төрле җәнлекләрне гәүдәләндергән этюдлар уйнап күрсәттеләр, уңай эмоцияләр алдылар, шатландылар, елмайдылар. Соңыннан аларга баллы күчтәнәчләр тапшырылды.
Халыклар дуслыгы йорты